بين شاب وشايب ( نبطي)

[أبوحيدر....]

انا : أبوحيدر

هذه قصيده بين شايب وشاب
قصيده حلوة حبيت انكم تقروها

إقرأ يافائق يارائق= قصيده معناها صادق
تحكي عن واقع وحقائق= والعاقل عقله ميزاني
قصه فيها كل عجائب= شابّن تقابل مع شايب
والكل منهم بيعاتب= مافيهم واحد غلطاني
قال الشايب : آآآآه ياحسرة= منكم ياشباب الدشرة
والله لا اوصفكم عشرة= وافضحكم بين العربان
الأول في البيت مفرّك =عند الدش و مايتحرك
اضحك للدنيا تضحك لك =خلص فلم وحط الثاني
والثاني شاري سيارة= ويفحط في وسط الحارة
ماسك في يده سجاره =سجارة من ذا الدخاني
يمشي والله ماهو داري= كسّر غطيان المجاري
يفحط ويدقدق بواري= وازعج جميع السكاني
والثالث قصته قصه= يبغى حلاقن بمقصه
من شأن يقصقص له قصه= ويخليه ولد فناني
لكن التركي قد حاسه= حاسه بمقصه وامواسه
طلّع لحيه مثل الكاسه =وسوا له عرف الشيطاني
يلبس جنز ويرقص رقصن= في ضني يسومنه دسكون
ويقلد مايكل بن جاكسون= ذاك الخكري الأمريكاني
والرابع رجّالن فني= شاري له عودن ويغني
لانا منه ولاهو مني= لابدناه ولايدناني
عانه في الأستريو عانه= يبغى شريط الفنانه
يبغى نجوى مدري ديانه= يموت في الصوت اللبناني
والخامس والله من حقي= اقضبه واطقه طقي
في السوق يحدر ويلّقي= من دكانن في دكاني
يرمي رقم وياخذ رقما= ياجعله بالبندق يرمى
والا جعل عيونه تعمى= خربانن والله خرباني
والسادس سافر للخارج= ويش الحاصل ويش الناتج
جاب امراضن ما تتعالج= ما كانت في ذي البلداني
والباقين عشّاق الكوره= كل نادي بجمهوره
النفس منهم مقهوره= والقلب منهم مرضاني
نصراوي واهلي وهلالي= والإتي مقامه عالي
صفوة منتخبنا الغالي= واسماهم فوق الجدراني
قال الشابّ : إسمع ياشايب= طلّعت فينا المصائب
سمّعت الحاضر والغائب= وانتم خمسه يالشيباني
الأول شايب متقاعد= حيّاً يرزق ميت قاعد
لكن صوته مثل الراعد= يحكي كان وياماكاني
متقاعد ومؤّذي اهله= يطلب شربه يطلب اكله
مراتن يشخط في الكهله= ومرة يضرب في البزراني
يزعل من صوت الأولادي= مايبغى الا الجو الهادي
متمسّك دائم بالرادي= يسمع فيه أم حديجاني
والثاني روحه معنيها= يامتعبها يامشقيها
يصبغ دقنه ويحنيها= ومرّكب له طقم اسناني
يأخذ باكوره وعباته= وان شاف عجوزن بلقاته
خبى الباكور بمخباته= وتظاهر كنه نشطاني
والثالث لاحالك حاله= همه كيف تزيد امواله
يبكي من مصروف عياله= ويقول المصروف اعماني
يجلس يترقب لوليمه= يفرح ليا جت عزيمه
إلحق يامال الغنيمه= وليمه عند الجيراني
والرابع عودن في الميّه= لكن داخل به جنية
يبغى يتزوج صبيه= ويخلف منها صبياني
والخامس شاري له ناقه= ومسجلها في البطاقه
ماله مع احدن علاقة =عائش معها في البرّاني

[طالب الخير....]

الكلمات غير واضحة عندي معظمها يوجد في بدايتها حرف الباء زيادة . هل المشكلة في التنسيق ؟

[أبوحيدر....]

اعتقد ان المشكلة من عندك

جميلة جداً ومضحكة ولا توجد عندي مشكلة
وقفت عند البيت هذا وأعجبني

(متـمـسّـك دائـــم بــالــرادي===يسـمـع فـيــه أم حديـجـانـي)

أكيد تعرف لييييييش !!!

[افلاطون....]

قصيدة جميلة والتنسيق خاطئ لأن البيت الواحد يتكون من أربعة أشطر ثلاثة لها نفس القافية و الشطرالرابع قافية القصيدة هذا والله أعلم...

[طالب الخير....]

بعد تغيير المتصفح ضبطت معي وشكرا على المشاركة الممتعة

[ابو اميره(•'.'•)]

ماشاء الله
الشاعر وقت المدح يلقى المدح ولو المقصود ما يستاهل
ووقت الذم ما يخفى على الشاعر خافية
ما عرفت من فين تجيهم الافكار